ممممم نفسي في كفتة بطاطس بالتونة

سويت بحث في الإنترنت عليها وطلعت الطريقة وبدي أسويها على الغدا ان شالله شكلها شهي جعت وبطني تقرقر

اخدت الطريقة من النت عشان امكن امكن يوم تجوعوا وما تعرفوا اش تطبخوا

وطريقة تحضيرها كالآتي:

المقادير:

4 حبات بطاطس كبيرة.

2 بصلة متوسطة.

4 علب تونة كبيرة.

3 بيضات.

نصف حزمة بقدونس مفروم.

زيت للقلي.

نصف معلقة فلفل (ونصف ملعقة ملح).

طريقة التحضير:

ـ تغسل البطاطس ثم تسلق إلى أن تنضج ثم تقشر وتهرس جيداً.

ـ يفرم البصل ناعماً.

ـ اخلطي البصل جيدا مع البطاطس والبيض والبقدونس والملح والفلفل الأسود جيدا.

ـ صفى التونة ثم ضعيها على الخليط واخلطي جيداً.

ـ جهزي صينية ورشيها بقليل من الدقيق ثم شكلي الكفتة على شكل أقراص دائرية ورصيها في الصينية.

ـ اقدحي الزيت ثم هدئي النار.. اغمسي أقراص الكفتة في الدقيق ثم ضعيها في الزيت واتركيها حتى تحمر قليلا ثم انشليها من الزيت وضعيها على الورق الخاص للقلي.

ـ رصيها في طبق التقديم وتزين بأوراق الخس وحلقات الطماطم.

أفكار لحفلة التخرج

هادي بعض الأفكار الحلوة لحفلات التخرج الصورة الأولى كب كيك مقلوب والقبعه اما بسكوت أو اي حاجة تقوم مقامه وفوق حبة ام اند امز والصورة الي تحت بطاقات دعوة للحفلة مكتوبة وملفوفة وفوق ممسوكة بقبعات تخرج صغيرة تنعمل بالورق المقوى
والبطاقات الصغيرة أبيات شعر عن التخرج وبهادي المناسبة ألف مبرووووك لكل الخريجين أولهم زوجي وأنا

شنطة جديدة

أحس روزي بنك بتضربني من كتر ما بآخد من موقعها طرق عمل اشياء هههههه عملت هادي الشنطة من بلقها بس المقاسات من راسي وعملت معاها المحفظة طقم بس طلعت جيوبها صغيرة شوية على البطاقات

تراااااااااا غرفتي الجديدة

وأخيراً تمت غرفة الخياطة بحمد الله طبعاً سويتي بيدي الشريفة هههههه من صبغ واستنسل وتسيق واضاءة وهادي بعض الصور للغرفة بس انتبهوا ترا باقي لسه طاولة الخياطة الي انشالله بشتريها واحطها في المكان الفاضي
هادي الغرفة أثناء العمل

وهادي بعد العمل

وإن شالله الخطة القادمة اجيب الحاجز عشان اغطي القرمبع الي ورا في الركن وعلى فكرة العلب الي حاطة فيها الأقمشة ان شالله لما اجيب الطاولة حخشها تحتها عشان المنظر يكون ارتب

الأطفال الطعمين

طلعت الصورة حلللللللللوة ماشالله
هدولا الحلوين في بيت جدتهم وكان ضهر الجمعه شوفوا ولدي عزوز الشمس دبحتوا مو عارف اش يسوي
أول مرة يقعدوا ماشالله عليهم شوية في المرجيحه اكيد ولا ثانية بعد التصوير قعدوا القعده هادي بس هي صيدة

ألوان في ألوان

اليوم صبغت المرحلة الأولى من الغرفة طبعاً اتجهزت اول شي رول وصحن الرول مدري اش يسموه والبوية طبعاً ولبست لبس قديم وحطيت كمامة اصر زوجي البسها مع أنها تحرر بس لبستها عشان الرذاذ وهات يا شغل جبت السلم وبدأت قلت نص الجدار اليوم نصه بكرة ومع الحماس سويته كله اليوم خخخخخ قولوا ماشالله طبعا لما نشف طلعت العيوب ورجعت صبغت الأجزاء الي يبغالها صبغ مرة تانية باقيلي بكرة انشالله بالفرشة اسوي الأجزاء الصغيرة وأمسح الأجزاء الي يبغالها مسح وبعدين ابدأ اللون التاني
بس اللون طلع حلو ماشالله ونشف بسرعة وريحته مو قوية من جوتن >>اسوي دعاية
طبعاً محتشوفوا صور الغرفة إلا لما أخلص منها نهائيا خخخخ عشان تتحمسوا

أوكيه اليوم اتحسنت النفسية

السلام عليكم
الحمد لله حصلت أشياء حلوة دي اليومين رفعت معنوياتي
والحمد لله السحابه الي كانت فوق راسي راحت
اممممممم ايوة صح جهزت اغراض الغرفه البوية والرولات طبعا ًبمساعدة روزي بينك دريم وغلفت الأفياش وفرشت الأرضية باقي أبدأ يا بكرة يا بعده ادعولي تزبط الغرفه .
حبيت اقلكم لا تكتئبوا من كلامي الي قلته قبل كم يوم
تجيني حالات وتمر وارجع عادي الحمد لله اني عندي المرونة هادي
ياربي شعري هادا مو راضي يطول لما قررت أطوله صار يطول ببطء ولما كنت فاصته وعجبني طوله طول بسرعه ههههههه
ابغا اشوف دي المرة اقدر اصبر وما اقصه كالعاده لما يوصل طول معين ولا لا؟
الحمد لله اليوم مبسوطة

إكتئــــــــــــاب

فيني إكتئاب اليومين دي
وحشتني مكة ووحشوني أهلها يارب ييسر لنا نروحلها
يارب تجمعني مع اهلي على خير
في أشياء كتيير في دي الحياة بدون طعم او طعمها مو زي الي اتوقعناه
أيام تمر علي أحس الحياه مالها طعم
أو تكون الألوان كلها لون واحد ماتفرق
ومرات اشوف كل شي مشي عابر
أو استنى اليوم يخلص عشان بس احط راسي وأنام
مرات أفكر لو أنام وأصحى في عالم تاني مو لأن العالم الي عايشة فيه وحش لا
بس الواحد مرات يحس إنه يبى ياخد اجازة حتى من نفسه
أكره شي لما الواحد يكون مضايق بس ما يعرف سبب محدد
أنا على قد ما أكون متفائلة تجيني درجات من الإحباط
الواحد مرات مايقدر يفضفض ولا يكتب ولا يقول
بس في واحد احد ما ينسى عبده وانا دايما يقيني بالله كبير
الله يغفر لي ذنوبي ويدخلني الجنة وأموت وربي راضي عني

صور وذكريات

هادي الحلوة ماشالله بنت أختي يعنني كبرت

هادي صورة بسه صغنطوطة كانت في حوش بيت أهل زوجي ورا جهة الخزان الي عجبني ان السلحفاة هي الي بتعتني بالبسه هم ثلاثه بسس بس مدري ليه دي بالزات السلحفاه بتنتبه عليها شوفوا حتى جات فغسطتها والبسه ما قالت شي مبسوطة كمان

يمي يمي هادا الإسكريم من فدركرز من زمااااان اكلت فيه وشكله صراحه رهيب ماقدرت افوته وصورته وكل مرة اشوف الصورة اتزكر الطعم ياسلالالالالالالالام

هادي الفكرة من بيت روزي بينك دريم القديم هي فكرة وحركة تحت الطاولة هادي حمام عربي الله يعزكم وهي ما حبته فخبته بدي الطريقة حلوة صح؟

وهادي جاتني هدية من روزي بنك في عيد من الأعياد بس أنا حطيت الورود وصارت منظر حلوعلى طاولةالمطبخ

هادا حوش بيت أهل زوجي زمااان لما كان فيه ورورد حلوة ودا الحاجز الحلو

شنط في شنط

هادي شنطة عملتها من أحد المواقع ما اذكره بس سيفت طريقة العمل في جهازي قصة البنت أنها كانت تبى تشتري شنطة ماركة شانيل بس لقيتها غالية وعجبتها فقالت الا وتسوي زيها واتحدت نفسها وسوتها وبالنسبة لي أنا عجبني شكل الشنطة فطورتها بالشكل الي ابغاه سويت نفس الطريقة بس بدل ما أحط علامة شانيل حطيت علامة ورد وألوان خخخخخخ لو يشوفوني راح يقاضوني هههههه
الشنطة الي تحت هي شنطة البنت الي عملتها تقليد لشانيل

نسيت أقول إن هادي الشنطة الي كنت أحاول اسوي زيها طبعاً هادي أزبط وأحلى من شنطتي

جاني العصبي

لي يومين احاول ادخل في البلق مو راضي سويت كل شي ولا هو راضي اليوم وأخيييييرا قدرت ادخل تبين والله اعلم انه احد ماخد باسوردي المهم ماخلاني ادخل الا لما غيرت باسوردي في قوقل اكاونت ودخلت منه ولا الدخول من البلق العادي ما يدخلني
وبعد المقدمة الممله حبيت اوريكم آخر جديدي شنطة القلوب تعبتني حبتين وهادي النتيجه الشنطة قبل التعديل
وهادي بعد التعديل

lap top cover

This is an idea that i liked, i might make a somthing like it or close to it.. and the picture at the bottom is nice too.
my sister wants a cover like this.